सुर्खेत ।
सुर्खेत विमानस्थल धावनमार्ग विस्तारका लागि मन्त्रिपरिषद बैठकले ३० विगाह जग्गा अधिग्रहण गर्न नेपाल नागरिक उड्डयन प्राधिकरणले अनुमति पाएसँगै दोस्रो पटक विस्तार हुने निश्चित भएको हो । मन्त्रिपरिषदले स्वीकृति दिएपछि सुर्खेत विमानस्थलको धावनमार्ग विस्तार गर्न बाटो खुलेको छ ।
एक हजार २५५ मिटर लम्बाई रहेको विमानस्थल साँघुरो र धावनमार्ग छोटो भएको भन्दै कम्तीमा तीन सय मिटर विस्तार गर्न आवाज उठिरहेको थियो । मन्त्रिपरिषदको बैठकले जग्गा अधिग्रहण गर्न स्वीकृति दिएपछि अव धावनमार्ग कम्तीमा एक हजार पाँच सय मिटर लामो गराउन सकिनेछभने साना तथा ठूला जहाज पनि उडान तथा अवतरण गर्न सकिने विश्वास गरिएको छ ।
मन्त्रिपरिषदले जग्गा अधिग्रहण गर्न स्वीकृति दिएपछि विमानस्थल विस्तारमा केही चुनौती देखिएको छ । दक्षिणतर्फ रत्न राजमार्ग र काँक्रेविहार डाँडा रहेको छभने उत्तरतर्फ विद्यालय तथा बाक्लो बस्ती छ । दक्षिणमा काँक्रेविहारको डाँडाले गर्दा सम्भव नभएकोले उत्तरतर्फ विद्यालय तथा बस्ती हटाएर भए पनि विस्तार गर्नुपर्ने आवाज विगतमा उठेको थियो । धावनमार्ग विस्तारका लागि गत असोजमा संघीय सरकार र कर्णाली प्रदेश सरकारवीच गत असोज १५ गते सम्झौता भएको थियो । जसमा दुवै सरकारले ५०÷५० प्रतिशत लगानी गर्ने उल्लेख छ । जग्गा अधिग्रहणका लागि लाग्ने रकममा प्रदेश र संघीय सरकारले आधा आधा व्यहोर्ने बताइएको छ ।
सुर्खेत विमानस्थल विस्तारको माग गर्दै आएको निजी क्षेत्रले पनि मन्त्रिपरिषदको निर्णयको स्वागत गर्दै अव जग्गा अधिग्रहणको कामसँगै विस्तारको काम पनि थाल्न आग्रह गरेको छ । सुर्खेत उद्योग बाणिज्य संघका महासचिव लक्ष्मण कँडेलले धावनमार्ग विस्तार गर्दा उत्तरतर्फ गर्न सुझाव दिनुभयो । उहाँले दक्षिणतर्फ पनि सम्भावना भएको तर सडक र काँक्रेविहारको डाँडाले गर्दा केही कठिनाइ हुने उल्लेख गर्नुभयो । यद्यपि प्राविधिकरुपमा जता सहज हुन्छ त्यस्ता गर्नुपर्ने उहाँको भनाइ छ । वर्षौंदेखि निजी क्षेत्रले सुर्खेत विमानस्थलको विस्तारको माग गर्दै आएको र अहिले विस्तार गर्न जग्गा अधिग्रहण गर्न स्वीकृति दिएपछि प्रदेशमा हवाई यातायातको चाप बढ्नेछ । यहाँको धावन मार्ग सानो हुँदा ७२ सिटे जहाज आउन नसकेको र निजी क्षेत्रको एउटा ४२ सिटे जहाजले महँगो भाडा लिने गरेको छ । धावनमार्ग विस्तार भएपछि मध्यम जहाजहरु आउने र भाडा पनि सस्तो हुने महासचिव कँडेलले बताउनुभयो ।
सुर्खेत नागरिक उड्डयन प्राधिकरणले हालको धावनमार्गको उत्तरतर्फ विस्तार गर्न सकिने प्रारम्भिक खाका निकालेको छ । प्राधिकरण प्रमुख उमेशकुमार पन्थीले केन्द्रको टोलीले विस्तारको अध्ययन गर्दा लम्बाई उत्तरतर्फ ४६० मिटर, दक्षिणतर्फ करिव दुई सय मिटर र चौडाई १६० मिटर क्षेत्र अधिग्रहण गर्न सकिने प्रारम्भिक निष्कर्ष निकालेको बताउनुभयो ।
दक्षिणतर्फ राजमार्ग भएकोले त्यसभन्दा तलतिर पनि जग्गा अधिग्रहण गरिनेछ । धावनमार्ग भन्दा पनि रात्री उडानका लागि आवश्यक पर्ने बत्तीहरु राख्नका लागि दक्षिणतर्फ पनि अधिग्रहण गर्नुपर्ने प्राविधिहरुले बताएको जानकारी पन्थीले दिनुभयो । उत्तरतर्फ भने बाक्लो बस्ती र विद्यालय छ । यसकासाथै विमनस्थलको मूल गेटनेर टर्मिनल हलपनि बनाइने बताइएको छ । अधिग्रहणको लागि स्वीकृति पाएपछि केन्द्रको टोली आएर सर्वपक्षीय छलफल गरी काम अघि बढाइने उहाँले बताउनुभयो । २०२३ सालमा स्थापना भएको सुर्खेत विमानस्थलको लम्बाई एक हजार मिटर रहेको थियो । छ वर्ष अघि २५० मिटर विस्तार गरी एक हजार २५५ मिटर पु¥याइएको थियो ।