सुर्खेत ।
सुर्खेत उद्योग बाणिज्य संघको सोमवार बस्ने भनिएको बैठक हठात स्थगित गरिएका उद्योग उपाध्यक्ष गणेशकुमार बस्नेतसहित आठ जना अन्य सदस्यहरुले आपत्ति जनाएका छन् । उनीहरुले सोमवार संयुक्तरुपमा हस्ताक्षर गरिएको सूचना जारी गरी स्थगित गरिएको बैठकप्रति आपत्ति जनाउँदै अविलम्ब बैठक आव्हानको मागसमेत गरेका छन् ।
संघको सोमवार बस्ने नियमित बैठक विशेष कारणबस स्थगित भएको भनिएतापनि कुनै कारण नखुलाई स्थगित गरिएकोमा ध्यानाकर्षण भएको जनाएका छन् । अहिले संघमा महत्वपूर्ण विषयमा अनिवार्य छलफल गर्नुपर्ने भएको हुँदा अविलम्ब बैठक आव्हानको माग गरिएको छ । साथै बैठकमा चार वटा एजेण्डामा छलफल गर्नुपर्नेपनि भनिएको छ ।
कर्णाली एक्स्पोको आयव्यय सार्वजनिक, उद्योग बाणिज्य महासंघको निर्वाचनमा उम्मेदवारी सिफारिस सम्वन्धमा, महासंघको कर्णाली प्रदेश निर्वाचनको उम्मेदवारी सिफारिस सम्वन्धमा र महासंघको ५४ औं साधारणसभामा मुख्य प्रतिनिधि, प्रतिनिधि र पर्यवेक्षक पठाउने सम्वन्धको एजेण्डाहरु बैठकमा छलफल गर्नुपर्ने भएकोले संघको विधानको परिच्छेद नं. ४ को १४ ग बमोजिम बैठक आव्हानको माग गरिएको छ ।
यसरी बैठक माग गर्नेहरुमा संघका उद्योग उपाध्यक्ष गणेशकुमार बस्नेतसहित सदस्यहरु रामबहादुर गौतम, सिंहराज बम ठकुरी, हरिकुमार श्रेष्ठ, प्रेमबहादुर रावत, तेजप्रसाद तिवारी, सिया कार्की प्रधान र टिकाकुमारी कँडेल रहेका छन् । उनीहरुले बैठक आव्हानको बोधार्थ जिल्ला प्रशासन कार्यालय, नेपाल उद्योग बाणिज्य महासंघ केन्द्रीय समिति र महासंघ कर्णाली प्रदेशलाई दिएका छन् ।
उद्योग उपाध्यक्ष गणेशकुमार बस्नेतले संघको नियमित बैठक हरेक महिनाको दोस्रो सोमवार बस्ने गरेकोमा यसपटक कुनै सल्लाह नै नगरी अध्यक्षले एकलौटीरुपमा बैठक स्थगित गरेको बताए । अर्को बैठक कहिले बस्ने भन्ने कुनै टुंगो नलागेको र विभिन्न महत्वपूर्ण एजेण्डामा छलफल गर्नुपर्ने भएकोले छिटो बैठक बस्नुपर्ने उनको भनाइ छ ।
यता संघले भने वैठक आव्हानको एक साताभित्र बैठक बस्ने जनाएको छ । संघका अध्यक्ष धनबहादुर रावतले अवको एक साताभित्र बैठक बस्ने जनाएका छन् । उनले उद्योग बाणिज्य महासंघको निर्वाचनका लागि आकांक्षीहरु धेरै भएकोले सहमति बनाउनका लागि बैठक केही दिन ढिलो सारिएको बताए । उनले महासंघका उम्मेदवारका आकांक्षीहरुलाई सवैलाई राखेर निर्णय गराउन सकिन्छ भन्ने प्रयासमा रहेकोले अवको एक हप्ताभित्र बैठक बस्ने दावी गरे ।