सुर्खेत ।

सुर्खेतका विपन्न र दलित महिलालाई आयआर्जनमा सघाउनका लागि विभिन्न सहयोग गरिएको छ । दलित महिला संघ, जुरी नेपालले युएनवुमनको सहयोगमा संचालित अाघातपछिकाे सशक्तिकरणकाे बाटाे हाम्राे सहयात्रा परियाेजनाबाट बीरेन्द्रनगर, गुर्भाकोट, भेरीगंगा र लेकबेसी नगरपालिकाका ५० जना अति विपन्न र दलित महिलालाई आयआर्जनमा सघाउन बाख्रा, कुखुरा, भैंसीका पाडीलगायतको सहयोग गरेको हो ।

बाख्रा, पाडा, कुखुराका माध्यमबाट आयआर्जन बढाई आफ्नो घरायसी खर्च व्यवस्थापनमा सघाउने उद्देश्यले सो सहयोग गरिएको जनाइएको छ । लेकबेसी नगरपालिका—७ लबना, वडा नं. १ को रातामाटे, गुर्भाकोट नगरपालिका—१२ दहचौर, वडा नं. ६ को बडाखोली, बीरेन्द्रनगर—१ र ११ तथा भेरीगंगा—११ र १२ मा स्थानीय खरी प्रजाति र बोयर क्रसका बाख्रा, पाडी, कुखुरालगायतका सहयोग गरिएको छ । संस्थाले गठन गरेको समूहलाई स्थानीय पालिकाले अति विपन्न सदस्य छनोट गरेकाहरु विपन्न महिलालाई सो सहयोग गरिएको दलित महिला संघ सुर्खेतका कार्यक्रम संयोजक मीना विश्वकर्माले बताउनुभयो ।
विपन्न महिलालाई करिव १० हजारदेखि १३ हजार मूल्यका बाख्रा दिइएको छ । चार पालिकामा ४२ जना विपन्न महिलालाई बाख्रा, दुई जनालाई भैंसीको पाडी, दुई जनालाई सिलाई, दुई जनालाई कुखुरा, एक जनालाई डोको र एक जनालाई खुद्रा सहयोग गरिएको जानकारी उहाँले दिनुभयो । यही सहयोगलाई विस्तार गरी कम्तीमा आफू आत्मनिर्भर बन्न सघाउने उद्देश्यले विपन्न महिला छनोट गरी सहयोग प्रदान गरिएको उहाँको भनाइ छ । अघिल्लो वर्ष ६४ जनालाई बाख्रा र अनन्य ब्यवसाय गरी ८० जनालाइ सहयाेग बितरण गरिएको छ ।

दलित महिला संघ सुर्खेतका अध्यक्ष मन्जु सुनारले अति विपन्न, दलित र सीमान्तकृत महिलालाई सहयोगको दायरामा ल्याइ आर्थिक अवस्थामा सुधार ल्याउन बाख्रा, पाडीलगायतको सहयोग गरिएको बताउनुभयो । उहाँले सहयोगलाई सदुपयोग गर्न सुझाव दिदैं दुरुपयोग भएकोमा पाइएमा संस्थाले सहयोग फिर्ता लिने उल्लेख गर्नुभयो । गुर्भाकोट नगरपालिका—६ का वडाअध्यक्ष गोविन्द वलीले सरकारले मात्रै सहयोग गर्न नसक्ने हुँदा साझेदार निकायको सहयोगमा विपन्नहरुको आर्थिक अवस्था सुधार गर्न यस्ता सहयोगले सघाउ पु¥याएको बताउनुभयो । उहाँले पनि सहयोगलाई दुरुपयोग गर्न सचेत गराउनुभयो । सहयोग प्राप्त गरेपछि प्रमिला धौलाकोटी, चन्द्रा टमटाले एउटा बाख्राबाट आयआर्जनको सुरुवात गरिएको बताउँदै दुरुपयोग नगर्ने प्रतिवद्धता जनाउनुभयो । कोभिडको बेलामा पनि विपन्नहरुको दैनिक जीवनमा समस्या आएको भन्दै ग्याँस चुलो, तीन महिना पुग्ने खाद्यान्न, मोबाइल फोनलगायतको सहयोग गरिएको थियो ।